كتب ليك رسالة

* بكتب ليك رسالة حب
بحروف مرسومة في جواي
رسالة بتحكي ليك الحب
ومكانتك انت في دنياي
لقيتك يا ملاك صدفة
وجعلتك انت كل مناي
محال اعشق سواك انسان
ومحال غيرك يكون مرساي

* احس الوقت من غيرك زمن واقف بلا معنى
واحس بالبسمة لي غيرك مسيخة
ومره زي عبره
واحس لمن تجي رسالتك ظلام شاقيهو ضي قمره

* حبك لي غالي علي
بحسوا بقلبي
وبشوفوا بعيني
حبك لي
بطمني
بعيشني احلى سنين عمري
احساسي معاك صدقتوا خلاص في عيني
انا ليك ومعاك
حبيبي ارتاح عمري ما حا انساك

* يا المخلوق بلون الطيف
اوصف فيك
اوصف كيف
يا الحيرت اوصافي
يا السر العميق خافي
بحر ما طالتو مرافئ
وابلغ من وصف شاعر
عشان يتختا في قوافي
منك تبتدي الروعة
وبعدك روعة جد ما في

*انا لو اقول اشتقت ليك
ما اظن قلت الجديد
لكن بقول احتجت ليك
والحوجة افضح للبريد
والوحشة في البعاد
تتنازع الاشواق شديد

* بقيت اعشق هوى الدنيا
بقيت اسرح مع الاحلام
رسمتك في ضفاف النيل
سمعتك في صدى الأمواج
حلمت معاك اكون انسان
اسوق الدهشة في الواقع
اشوف اللهفة في عينيك
بتغمر طرفك النعسان

*خايف ان الزمن يبعدك عني
تقفي وتزيد من نزف الجروح
ان الغير يسرقك مني
وعلى صدي صوتك ابكي وانوح
بحق الغلا صارحني وعلمني
اديني من الأمل قصر وصروح
وحياة عيونك ريحني وطمني
انا استاهل قلبك
ولا امشي واروح

* لو تمادى الدهر مرة
والستار بيناتنا سدلوا
والا طالت بينا مدة
والتلاقي امتد اجلو
المسافة اكيد ما بتقصر
والرسايل تبقى بدلوا

* بتمنى ليك كل السمح
لا تشوف عذاب لا تنجرح
واتمنى ليك سعد العمر
لا حسرة ولا احزان تمر
ويا ربي تنعم بالصبر
ويديك كمان طولة العمر

* كنوز جواك ما بتكمل تضوي الليل
وتتجمل زي عصفورة حامت فوق وركت في قليب انبل
كنوز من شهدك الفياض ونكهة روحك الصندل
ما انته سواحلك الافراح
ومنبع نيلك المنهل
وصورتك شرفة الاحلام
ومشاهد نجمة تتجول

* تبقى كل الدنيا سمحة لما بس هاتفك يواصل
ترحل احزاني العميقه
ويستقر فرحي المسافر
اصلو شوقك فيني راسي منتظر عينيك تراسل
ابقى واصل ما العيون الفي انتظارك زي مطر الفواصل

* يا سلام لو كنت تعرف انت ايه بالنسبة ليا
ما بقول ليك انت روحي
احتمال اكبر شوية
بس تاكد انو ريدك في الضلوع نيرانو حية
مستحيل في يوم حتخمد طالما الدم جاري فيا

* منو الزيك يحس بالناس
منو االزيك جميل حساس
ومشتاقين يا اعز الناس
اعين فيك الاقي خطاك معاي ديمة
واشوف عينيك مع الغيمة
واشيل ذكراك صفة وسيمة
يا اروع زول
قدر يكسر رتابة الكون
ويتحكر في الاعماق هوى وقيمة

* لو قلت عايز تحتجب عشان تحس بشوقنا ليك
او قلت عايز تختفي وتبعد عشان ما نشتهيك
خليك عارف انو لو طول غيابك انحنا ارواحنا بتجيك